१३ औं दक्षिण एसियाली खेलकुद साग अर्न्तगत ब्याडमिन्टनको सामान खरिदमा अनियमितता भएको निश्कर्ष निकालिएको छ । सागमा ब्याडमिन्टन खेलाडीका लागि खरिद गरिएको जुत्ता र म्याटमा अनियमितता भएको भन्दै छानबिन समितिले निश्कर्ष निकाकलेको हो ।

युवा तथा खेलकुद मन्त्रालयले राष्ट्रिय खेलकुद परिषद् (राखेप) लाई दिएको निर्देशन अनुसार राखेपले गत महिना सदस्य गोविन्द भट्टराईको संयोजकत्वमा अनियमितता छानबिन समिति गठन गरेको थियो । समितिले गत महिनादेखि नै अनियमितताको छानविन सुरु गरेको थियो । 

छानबिन समितिले खेलाडीको सामग्री खरिदमा अनियमितता भएको निश्कर्षसहित मंगलबार राखेपमा प्रतिवेदन बुझाएको छ । सबै विषयको अध्ययन गरेर मंगलबार राखेपलाई प्रतिवेदन बुझाएको भट्टराईले जानकारी दिए । 

खेलाडीले आफूले पाएका सामग्री निकै कमसल भएको बताएपछि र फर्जी बिल पेश गरेको भन्दै ब्याडमिन्टनका पदाधिकारीबाटै परेको उजुरीको आधारमा राखेपले छानबिन थालेको थियो । 

भट्टराईले छानबिन अनियमितता पाइएको र फर्जी बिल कसरी पारित भयो भन्‍ने अर्को चिन्ताको बिषय भएको बताए । छानबिन समितिमा भट्टराईसहित अर्जुन बिक, महेन्द्रकुमार राई, नारायण अर्याल र पासाङ शेर्पा सदस्य रहेका थिए । हामीले यो  समाचार बाह्रखरीबाट साभार गरेका हौ ।

जुत्ता खरिदमा प्रष्ट रुपमा अनियमितता,ब्याडमिन्टनको म्याट गुणस्तरहिन

समितिले ब्याडमिन्टनको जुत्ता खरिदमा प्रष्ट रुपमा अनियमितता भएको देखिएको बताएको छ । जुत्ता किन्न खेलाडीको पैसा निकासा भएको तर खेलाडीले सामान नपाएको देखिएको प्रतिवेदनमा उल्लेख छ । 

समितिले ब्याडमिन्टनको म्याट खरिदमा समेत अनियमितता भएको निष्कर्ष निकालेको छ । ब्याडमिन्टनको म्याट  गुणस्तरहिन पाइएको छ । पैसा अनुसारको सामान देखिएको छैन । समितिका सदस्य छानविनको क्रममा स्थलगत निरिक्षणका लागि पोखरा समेत पुगेका थिए । निरिक्षणको क्रममा म्याटको दुर्दशा देखेर आफूहरु चिन्तित बनेको समितिका अर्का एक सदस्यले बताए ।

म्याट खरिदमा लगाईएको आरोपमा आंशिक सत्यता देखिएको छ । तर पोखरामा निरिक्षणको क्रममा ब्याडमिन्टनको हलमा पानी चुहिएको देखियो । म्याट काम नलाग्ने अवस्थामा पुगेको छ । जति रकममा किनेपनि संरक्षण नहुँदा खेलकुद सम्पत्तीको बिजोग देखिन्छ । उनले भने । समितिले छानविनको क्रममा २३ जनासँग बयान लिएर ४१ पेजको प्रतिवेदन राखेप सदस्य सचिव समक्ष बुझाएको छ । समितिले सामान खरिद वितरणमा नीतिगत सुधारको सुझाव दिदै प्रक्रियागत भ्रष्टाचार देखिएको निष्कर्ष निकालेको हो ।

समितिले प्रतियोगिताको दौरानमा राखेप र संघहरु बीच समन्व्यको प्रष्ट अभाव देखिएको बताएको छ । संघका पदाधिकारीसँग छानविनका क्रममा सोधपुछ गर्दा आफूलाई कुनै जानकारी नभएको जवाफ दिएको छ । सबै काम राखेपका कर्मचारीले गरेको हुँदा त्यसको जिम्मेवार पनि उनीहरु नै हुने संघका पदाधिकारीको बयान छ ।

परिषद्का बोर्ड सदस्य सुबास श्रेष्ठले सागमा ब्याडमिन्टनमा खेलाडीको जुत्ता तथा म्याट खरिदमा अनियमितता भएको भन्दै छानविन गर्न माग गरेपछि मन्त्रालयको निर्देशनमा राखेपले छानविन समिति गठन गरेको थियो ।

प्रतियोगिता सम्पन्न भएको १० महिना बिते पनि राखेपले सागको खर्च विवरण सार्वजनिक गरेको छैन । कार्यविधिले प्रतियोगिता सम्पन्न हुने बित्तिकै खर्च विवरण सार्वजनिक गर्नुपर्ने उल्लेख छ । हामीले यो  समाचार केन्द्रबिन्दुबाट साभार गरेका हौ ।

अन्तिम पटक अध्यावधिक गरिएको 18 Viewed

प्रतिक्रिया दिनुहोस्