बन्दुक जनताले नलिई हुँदै हुँदैन : सुदर्शन, स्थायी कमिटी सदस्य, ने.क.पा.

संबाददाता : ओम हमाल     प्रकाशित मिति: (२०७५ माघ ८, मंगलवार) ०८:१७

(रातोपाटीको लागी पत्रकार फणिन्द्र नेपालले नेकपाका स्थायी समिति सदस्य हेमन्तप्रकाश ओली ‘सुदर्शन’संग लिएको अन्तर्वार्ता यहाँ प्रस्तुत गरिएको छ । यो अन्तर्बार्ता रातोपाटी डटकमबाट लिएका हौं ।)

नेपालमा साम्राज्यवादीहरूले माओवादीको बीउ सकियो भनेर सोचेका थिए । किनभने प्रचण्ड, बाबुरामलाई त्यसबाट विचलित पारियो अरू पनि विचलित भइसके । यो कोष्ठवाला नेकपा पनि सकियो भन्ने ठानेका थिए । तर यहाँ जबरजस्त रूपमा विकल्पका रूपमा हाम्रो पार्टी नेकपा खडा भयो ।

हाम्रो पार्टी खडा भइसकेपछि यसलाई पनि कसरी सिध्याउने भनेर अमेरिकादेखि मान्छेहरूको दौडादौड छ । यस्तो प्रकृया चल्दै गर्दा अहिलेको सरकारले दलाल पुँजीवादी आफ्ना मालिकहरूले जे जे भन्छन्, त्यो मानिरहेको अवस्था छ । साम्राज्यवादीहरूको आदेशमा नै नेपालका वास्तविक कम्युनिस्टहरू कसरी सिध्याउने भन्ने प्रयासअनुरूप हाम्रा नेता तथा कार्यकर्तामाथि धरपकड र आक्रमण भइरहेको छ । तर नेपाली जनतामा रोपिएको क्रान्तिकारी बीउ कुनै हालतमा मर्दैन र अगाडि बढ्छ बरु हाम्रो पार्टी स्थापित भएर जान्छ ।

सरकारले चन्दा आतङ्कदेखि बम विष्फोटसम्मका घटनामा तपार्ईंको पाटी संलग्न छ भनेको छ । कुनैबेला एउटै पार्टीमा रहेका नेताहरू नै अहिलेको सरकारमा छन् । यसरी हेर्दा सरकारले आफ्नो भूमिका निर्वाह गरेको छ भन्न सकिँदैन ?

चन्दा आतङ्क मच्चाएकाले हाम्रा नेता तथा कार्यकर्ता पक्राउ गरेको सरकारको दावी छ । त्यो चन्दा आतङ्कको कुरा नै होइन । हाम्रा प्रवक्ता साङ्गठानिक कार्यक्रमबाट आउँदै हुनुहन्थ्यो पक्राउ गरियो ।

दोस्रो कुरा, चन्दाकै आरोप लगाउने हो भने त हिजोदेखि प्रचण्ड, बाबुराम बादलले चन्दा उठाएनन् ? उनीहरू (प्रचण्ड, बाबुराम र बादल)लाई पनि थुनामा राख्नुपर्छ । त्योभन्दा पनि ठूलो कुरा त यिनीहरूले जसरी भ्रष्टाचार र ब्रह्मलुट गरेका छन् । हिजो केही पनि नभएकाहरू आज अर्बपति भएका छन् । उनीहरूले नै भ्रष्टाचारीहरूलाई उकेरा लगाएका छन्, संरक्षण गरेका छन् । तिनीहरूलाई पहिला थुन्नुपर्छ, यदि यो राज्यसत्ताको त्यो नियम हो भने ।

के बुझ्नुपर्छ भने हामीले निश्चय नै चन्दा उठाएका छौँ । जबरजस्त कतै उठाएका छैनौँ । हामीले दोहोरो सत्ता छ भनेका छौँ । हाम्रो जनसत्ता, जसलाई कर तिर्नुपर्छ भनेका पनि छौँ, केही मानिसलाई वर्गीकरण गरेर । यसले गर्दा कुरा उनीहरूले भनेजस्तो आतंक होइन, यो राजनीतिक कुरा हो । राजनीतिक रूपमा वैकल्पिक शक्तिको उदय भएको छ । यो शक्तिलाई कसरी सक्ने विनास गर्ने भन्ने उनीहरूको उद्देश्य हो भनेर बुझ्न जरुरी छ ।

तर तपाईंले यस्तो दाबी गरिरहँदा प्रकाण्डसँगै बरामद भएको आर्थिक विभागको कागजातमा त सात करोडभन्दा बढी आय देखिएको छ । चन्दा उठाएर आर्थिक आतङ्क मच्चाएको हैन भनेर कसरी विश्वास गर्ने ?
जे कुरा प्रचारमा ल्याइएको छ त्यो सत्यमा आधारित छैन । त्यो वाहियात हल्ला मात्रै हो । हामीले पार्टी सञ्चालनका लागि चन्दा उठाउँछौँ । चन्दा दिनेमा धेरै शुभचिन्तक छन् । त्यसको साथसाथै केहीबाट हामीले करका रूपमा पनि लिने गरेका छौँ तर जुन रकम भनेर उनीहरूले हल्ला मच्चाएका छन्, त्यो गलत कुरा हो । वास्तविक कुरा लुकाएर एउटा राजनीतिक पार्टीलाई बदनाम गर्ने काम सत्तापक्षले गरिरहेका छन् । यसबाट कुनै हालतमा जनता विचलित हुँदैनन् ।

तपाईंहरूले यो संविधान र व्यवस्था नै खारेजीको माग गर्नुभएको छ । तर यसको विकल्प केही दिनुभएको छैन । के हुनसक्छ विकल्प ? जनताले बुझ्नेगरी बताइदिनुस् न ?
यो सत्य कुरा हो, हामीले यो संविधान र व्यवस्था मान्दैनौँ भनेर घोषणा गरिसकेका छौँ । यसको विकल्प चाहेर नै हामी हाम्रा गतिविधि गरिरहेका छौँ । संविधान र व्यवस्था कसैलाई मान्ने अधिकार छ भने कसैलाई नमान्ने अधिकार पनि छ । नमान्ने हाम्रो अधिकार हो । क्रान्तिकारी भएको, नेपालको क्रान्ति बीचैमा तुहाएको र प्रचण्ड बाबुरामले गद्दारी गरेकाले हामी अर्को विकल्पमा गएका हौँ ।

यिनीहरूले जुन सत्ता अहिले चलाइरहेका छन् यो हिजोको भन्दा अझ बढी भ्रष्टाचारी भयो । लुटाहा प्रवृत्तिको भयो । त्यसैले यसको विकल्प चाहिन्छ भनेर नेपाली जनताले भनेका छन् । जनताले चाहेको कुरा हामीले सचेत रूपमा अगाडि बढाएका हौँ ।

यो संसदीय व्यवस्थाको विकल्प नै वैज्ञानिक समाजवाद हो । सरकारलाई हामीले सामाजिक दलाल पुँजीवादीहरूको सरकार भनेका हौँ । सामाजिक दलाल पुँजीवादीहरूको सत्ता सामाजिक फासीवादतर्फ जाँदैछ । राष्ट्रघात, जनघात, ढाड सेक्ने कर लगाउने र चरम भ्रष्टचार गर्ने काम हुदै आएको छ । यो सामाजिक फासीवाद अभिव्यक्त भएको हो । यसमा हाम्रो विकल्प या बाटो के हो भने वैज्ञानिक समाजवाद हो ।

के हो यो वैज्ञानिक समाजवाद ?
यो व्यवस्था भनेको जनताको व्यवस्था हो, जसले सातवटा प्रमुख कुरा हल गर्छ । ती हुन् गास, बास कपास, शिक्षा, स्वास्थ्य, रोजगार र सञ्चार । यी सात चीज जनताले अनिवार्य पाउनुपर्छ भन्ने हाम्रो मान्यता हो ।

नेपालमा पटक पटक आन्दोलन हुँदै आए । व्यवस्था परिवर्तन भए । पछिल्लो समय १० वर्षे जनयुद्ध पनि तपाईंहरूले नै गर्नुभयो र शान्ति प्रकृया हँुदै नयाँ संविधान र सङ्घीयता लागू भयो । यसरी लामो समय र कष्टपछि आएको व्यवस्था र संविधान यति सजिलै परिवर्तन गर्छौं या हुन्छ भनेर बुझ्नु गलत नहोला र ?

नेपाली जनताले चाहेको र हिजो हामीले जनयुद्ध गर्दा भनेको के हो भने, पुरानो सत्ता चकानाचुर नपारी नयाँ व्यवस्था स्थापना हुन सक्दैन र जनताले स्वतन्त्रता अथवा जनताले आफ्नो अधिकार प्राप्त र जनजीविकाको हक प्राप्त गर्न सक्दैनन् भनेर जसरी जनयुद्ध सुरु गरेका थियौँ त्यसको विपरीत र विपक्षमा गएर बीचमै जनयुद्धलाई तुहाइउो ।

दोस्रो कुरा राज्यसत्ता आमूल परिवर्तन भयो त ? भएन । केहो राज्यसत्ता भनेको ? राज्यसत्ता भनेको केही मानिस सरकारमा जाने र राज्यको सम्पत्ति लुट्ने कुरा होइन । राज्यसत्ता परिवर्तन भनेको त पहिलो कुरा सेना परिवर्तन हुनुपर्यो । दोस्रो कुरा प्रहरी परिवर्तन गर्नुपर्यो ।

त्यसैगरी अदालत र प्रशासन परिवर्तन गर्नुपर्यो । त्यसपछि जेल र अन्तिममा सरकार परिवर्तन हुने हो तर यहाँ राज्यसत्ता परिवर्तन गर्नुभनेको सरकार मात्रै परिवर्तन गर्नु हो भनेर हिजोदेखि नै बुझ्ने गरियो त्यो गलत हो ।

हामीले आमूल परिवर्तन ‘र्याडिकल चेन्ज’ भनेका हौँ । हामीलाई हिजो बाबुराम प्रचण्डले पनि बनिबनाउ राज्यसत्ता पुरानो राज्यसत्ता भत्काएर नयाँ राज्यसत्ता स्थापना गर्नुपर्छ भनेर सिकाएका थिए । जनवादी सत्ता स्थापना गर्ने भनेर नै हामीले जनयुद्ध गरेका हौँ । अर्को विचित्र त के छ भने जनयुद्धमा वर्गसत्रु रहेका केपी ओलीसँग घाँटी जोडेका छन् ।

तपार्ईंहरूले भनेको वैज्ञानिक समाजवाद जनताले कहिले उपयोग गर्न पाउँछन् त ? जनताले विभिन्न परिवर्तनका नाममा कहिलेसम्म दुःखकष्ट भोगिरहने ?
तपाईंले भनेको जनताले दुःख कष्ट सहन पर्ने कुरा सत्य हो । तर नेपाली जनताले सुख चाहिँ कहिले पाए ? कुन चाहिँ शासन र व्यवस्थाले नेपाली जनतालाई सुख दिएको थियो र अहिले दुःख पाए ? त्यस्तो त छैन । बरु झन झन दुःख पाउँदै गएका छन् । हामीले त जनतालाई दुःख दिने यो राज्यसत्ताको पूरै जरो उखेलेर त्यसको ठाउँमा नयाँ बिरुवा रोप्नुपर्छ भनेका छौँ । पुरानै घरामा बसेपछि त हिजो जे थियो आज पनि त्यही मात्रै हुन्छ । जनताको सुखका लागि हामीले जनयुद्ध सुरु गर्दा यहीँनिर बिसाउने त भनेका थिएनौँ । बरु के भनेका थियौँ भने यसरी हतियार उठाइसकेपछि बीचमै विसाउनु भनेको जनताप्रतिको ठूलो धोखाघडी हुनेछ ।

अहिले पनि हामी त्यही वाचा अगाडि बढाइरहेका छौँ । नेपाली जनतालाई नै सुख दिने हिसाबले हामी अघि बढिरहेका छौँ । आमूल परिवर्तन गरेर जनताको सुख समृृद्धि हुन्छ भन्नेमा हामी दृढ हुनेछौँ ।

त्यसका कार्ययोजना केके छन् त तपाईंहरूसँग ?
पहिलो कुरा त्यसका लागि सबै क्षेत्रमा विकल्प प्रस्तुत गर्छौं । सोभियत लागू गर्छौं । जस्तो रुसमा विकल्पका रूपमा सोभियत लागू भएको थियो । त्यो राज्यसत्ता हामी चलाउँछाँै । अदालत, प्रहरी प्रशासन, सेना हामी चलाउँछौँ । यसो गर्दै जाँदा पूर्णतः नयाँ सत्ताको विकास गर्दै अघि बढ्छौँ । यसक्रममा एकातिर जनतालाई विकास निर्माणका कुरा पनि दिँदै जान्छौँ र बाधा पुर्याउन खोज्ने पुरानो सत्तालाई ध्वस्त बनाउँदै जान्छौँ । यसो गर्न एकीकृत जनक्रान्ति आवश्यक पर्छ । यसो गरेपछि अन्ततः जनताको जित हुन्छ ।

विगत तीन वर्षदेखि तपाईंहरू नयाँ ढङ्गले हिँड्दै हुनुहुन्छ । ठ्याक्कै भनिदिनुस् तपाईंको पार्टी भूमिगत, अर्धभूमिगत वा खुला पार्टी हो ?
यसमा हामीले ठ्याक्कै यही हो भनेर घोषणा गरेका छैनौँ । यो परिस्थितिमा निर्भर हुन्छ । सहज परिस्थिति भयो, हाम्रा गतिविधि विनारोकटोक हुन पाए भने हामी खुला र स्वतन्त्र हुन्छौँ । हैन, राज्यले यसरी नै दमन गर्छ भने हामी जुनबेला जस्तो परिस्थिति आउँछ त्यो रणनीति अपनाउँदै अघि बढ्छौँ ।

पछिल्लो समय सरकारले तपाईंहरूका शीर्ष नेता तथा कार्यकर्ता नियन्त्रणमा लिन थालेपछि तपार्ईंहरू भूमिगत हुन थाल्नुभएको हो ?
त्यो स्वाभाविक हो । राज्यसत्तासँग सबैथोक हुन्छ । क्रान्तिकारीहरूसँग त्यस्तो सुविधा हुँदैन । त्यसकारण हामी जनताका बीचमा रहँदै कामकारवाही अगाडि बढाउनुपर्ने बाध्यता हुन्छ ।

एउटा नेकपा सरकारमा छ । त्यसमा तपाईंहरू जनयुद्ध लड्दाताकाका सहयात्री पनि छन् । अर्को नेकपा तपाईंहरू सङ्घर्षमा हुनुहुन्छ । एउटै थालमा भात खाएकाहरू यसरी फरकफरक बाटोमा लाग्नुलाई कतिपयले बनावटी नाटक पनि भनिरहेका छन् नि ?

शत्रु मित्रमा बदलिन्छ । मित्र शत्रुमा पनि बदलिन्छ । यो मान्यता अहिले हामीमा लागू भएको छ । यसलाई यसैगरी बुझ्दा उपयुक्त होला । प्रचण्डजीहरू यति छिटै चरम प्रतिकृयावादी हुनुहोला भनेर हामीले सोचेका पनि थिएनौँ । यति धेरै दलालमा परिणत हुनुहोला भनेर सोचेका थिएनौँ । अहिले केपी ओली र प्रचण्डमा कसले भारत र युरोपियन युनियनलाई रिझाउने भन्ने प्रतिस्पर्धा छ । यति तल्लो तहमा पुगेर साम्राज्यवादको दलाल होलान् भनेर हामीले सोचेका थिएनौँ । यो त निम्न पुँजीवादी अधैर्यता हो । प्रचण्ड, बाबुराम र बादलले निम्न पुँजीवादी अधैर्यता देखाए । यो कस्तो हुन्छ भने एकछिन तात्ने र एकै छिनमा सेलाउने । जस्तो सिलिबर भनौँ । सिलबरे नेता हुन् उनीहरू । हामीलाई आज बादलले गृहमन्त्रीको कुर्सीमा बसेर अपराधी भने । एउटा राजनीतिक पार्टीलाई अपराधी करार गरेर राज गरिरहका छन् बादल ।
अब यस्तो दिन आउँदैछ कि उनीहरूले कुकुरले नपाएको दुःख पाउँनेछन् । यो सत्य कुरा हो । उनीहरूले कि कम्युनिस्टको खोल नै फालेर हिँड्नुपर्छ नत्र भने त्यो खोल ओढ्दासम्म उनीहरूले सुख पाउँदैनन् ।

तपाईंहरू सँगसँगै जनयुद्ध लडेका गृहमन्त्री बादलप्रति बढी नै रुष्ट हुनूहुन्छ ?
बादलजीले कुकुरभक्ति नगरे हुन्थ्यो । उहाँले केपी ओलीजीको पिछलग्गू भएर क्रान्तिकारीहरूलाई दपेट्न खोज्नुभएको छ । त्यसो गर्नु उचित होइन ।

सरकारसंग वार्ताको परिस्थिति कतिबेला बन्छ ? होला त वार्ता ?

यो अवस्थामा वार्ता हुँदैन । हाम्रो वार्ता गर्ने परिस्थिति छैन । वार्ता जतिबेला हुन्छ, त्यतिबेला हामी एउटा सन्तुलनमा आएका हुन्छौँ ।

दोस्रो कुरा, जसरी सरकारले वार्तावार्ता भनेर भनेको छ, यो वार्ता गर्ने तरिका नै होइन । एकातिर हाम्रा साथीहरूलाई अपहरण शैलीमा हत्कडी लगाउने अर्कोतिर वार्ताको कुरा गर्ने कसरी मेल खान्छ यो ? सरकारले हामीलाई छोएर वार्ताका नाममा छाम्न खोजेको हो । किनकि यहाँ मुद्दा चुनावका बेलाको बनाइएको छ । नेताहरूलाई देशभरी हिरासतमा राखेर कहिले कता र कहिले कता घुमाइएको छ । फेरि वार्ता भनेर हामीलाई सीधै कुनै लिखित चिठीपत्र पनि पठाइएको छैन । त्यसकारण वार्ताको हल्ला चलाएर हामीलाई दमन गर्दै समाप्त पार्ने षडयन्त्र अनुसार सरकार चलेको भनेर हामीले बुझेका छौँ ।

वार्ताका लागि तपाईंहरूका शर्त के के हुन् ?
पहिलो कुरा त एउटा राजनीतिक पार्टीलाई त्यसै अनुरूपको मान्यता दिनुपर्छ । दोस्रो हिजो उहाँहरू आफैले कसरी राजनीति गर्नुभाथ्यो त्यो सोच्नुपर्छ । त्यतातर्फ पटक्कै नसोच्ने अनि वार्तावार्ता भन्ने ? अर्को कुरा झुठा मुद्दा किन लगाएको छ ? त्यसको जवाफ दिनुपर्दैन ? त्यस्ता मुद्दा हटाउनुपर्दैन ? अहिले त एकातिर अदालतले छोड्ने आदेश दिने अनि गेटमा पुग्न नपाउँदै हत्कडी लगाइहाल्ने ! यो कस्तो राजनीति हो ?
यसमा गल्ती भयो भनेर सार्वजनिक माफी माग्नुपर्छ, त्यसपछि मात्रै सोच्न सकिन्छ ।

एउटा कुरा तपाईंलाई भनौं– हामीले चुनावका बेला चाहेको भए सबैलाई सकिदिन्थ्यौँ । साच्चै नै चाहेको भए प्रचण्ड, बादल, वर्षमान सबै सकिन्थे । केपी ओली पनि सकिन्थे तर हामीले सुझबुझका साथ बचाईबचाई कारवाही गर्यौँ । त्यसक्रममा कहीँकतै थोरबहुत बचाउँदा बचाउँदै पनि केही मानिस परेको भने अवश्य हो ।

सरकार योभन्दा बढी लचक हुने ठाउँ छैन भन्छ, तपाईंहरू अहिले वार्ता नै हुन सक्दैन भन्नुहुन्छ । यदि वार्ता अघि बढ्दै बढेन भने के हुन्छ ?
वार्ताको विकल्प के हो भनेर हामीले अहिले जे गरेका छौँ त्यही हो । हामी जसरी अघि बढेका छौँ त्यसरी बढिरहन्छौँ । सरकारले जुन वार्ताको कुरा गरेको छ, त्यो संसारका प्रतिकृयावादीहरू मिलेर क्रान्तिकारीहरूलाई सिध्याउने खेलअन्तर्गत हो । यो सरकारको वार्ता गर्ने हैसियत पनि छैन । सरकारलाई युरोपियन युनियन र भारतीय विस्तारवादीले पनि वार्ता गर भनेर सघाएका छन् ।

तपाईंहरू पार्टी विस्तारमा लागेको तीन वर्ष भयो, योबीचमा चन्दा उठाउने र बम विस्फोट गर्ने कामबाहेक केही देखिँदैन । यसरी मानिसलाई आतङ्कित पारेर कसरी क्रान्ति सम्भव होला त ?
जनता आतङ्कित भएका छैनन्, भ्रष्टचारी आतङ्कित भएका छन् । घुसखोरी डराएका छन् । राज्यसत्तामा बसेर भ्रष्टाचार गर्न पल्केकाहरू लर्खराएका छन् । त्यही किसिमका प्रशासकहरू डराएका छन् । जनता त हाम्रै पक्षमा छन् । साथ दिइरहेका छन् । अब झन् दिनेछन् । यिनीहरू कति फटाहा, बदमास्, अत्याचारी हुन भन्ने अझ बढी जनताले बुझिसके । त्यसकारण हाम्रो पार्टी थप लोकप्रिय र जनताको पार्टी हुँदै जनतामा स्थापित भएको छ ।

तपाईंहरूले भनेको क्रान्तिको मोडल कस्तो हो ? त्यो प्रष्ट पारिदिनुस् न साथै अहिलेको युगमा बन्दुक पड्काएर क्रान्ति गर्छु भन्नु मूर्खता होइन ?

अहिलेको युगमा पनि बन्दुकबाट क्रान्ति सम्भव छ । नहुने भए हामी किन लाग्थ्यौँ ? आफूलाई सबैभन्दा सभ्य ठान्ने अमेरिका । ऊ हतियार र बन्दुककै भरमा अघि बढेको छ कि छैन ? तर हामीले सामान्य बम पड्काएको चाहिँ देख्ने ? सबैभन्दा ठूला भनिएका देशहरू जो छन् उनीहरू बम र बन्दुकबाटै चलेका छन् । आफू बन्दुकको तयारी गर्ने अरूलाई हुँदैन भन्ने ? यसको अर्थ जनताले बन्दुक उठाएभने उनीहरूलाई सिध्याउने ? यो हामी देखिरहेका छौँ ।

नेपालको राजनीतिक परिस्थति के हो भन्दा सामाजिक दलाल पुँजीवादीहरू अर्थात विग्रिएका कम्युनिस्टहरू फासीवादमा जाँदैछन् । यसलाई परास्त गर्न जनताले सैनिक तयारी गर्नुपर्छ । सैनिक तयारी नगरेसम्म जनताको जित हुनै सक्दैन । अरू उपाय नै छैन । उदाहरणकै लागि चुनावकै कुरा गराँै । तपाईंसँग एक करोड छैन भने एउटा वडाध्यक्षको उम्मेदवार बन्न सक्नुहुन्न । त्यसका लागि त धनाड्य नै हुनुपर्यो, धनसँग बन्दुक हुन्छ । त्यो बन्दुक र धन नभई चुनाव जित्दैन । त्यसकारण हामी के भन्छौँ भने बन्दुक जनताले नलिई हँुदैहुँदैन ।

नेपालमा अनगिन्ती समस्या छन् । सीमा समस्यादेखि छिमेकी देशको हेपाहा प्रवृत्ति छ । तपाईंहरू आफूलाई राष्ट्रवादी भन्दै हुनुहुन्छ । यी समस्याका बारेमा के सोच्नुभएको छ र के गर्दै हुनुहुन्छ ?
तपाईंको प्रश्न ठिकै हो । हामीले सीमाका कुरा पनि उठाएका छौँ । लिपुलेकको कुरा पनि गरेका छौँ । दक्षिणी भेगमा मिचिएका सीमा फिर्ता गर्नुपर्छ भनेर हामीले सरकारलाई भनेका पनि हौँ । साम्राज्यवादीहरूलाई पनि भन्यौँ । हाम्रो सीमामा आएर हाम्रा नागरिकको हत्या हुन्छ । तर सरकार चुप लाग्छ । यदि सरकारले हामीलाई अनुमति दिन्छ भने हामी यी कुरामा हस्तक्षेप गर्न तयार छौँ ।

मिचिएका सीमा जोगाउने जिम्मा स्वाभिमानी प्रत्येक नेपालीको हो । यसो गर्न तपाईंहरूलाई सरकारले भन्नैपर्छ र ! ल भन्यो रे भारतीय सेनासँग लड्ने हिम्मत छ ?
हामी पहिला यहाँको सत्तापक्षसँग लड्छौँ । जो भारतबाट गाइडेड छ, भारतीय सरकारभन्दा के फरक छ र यो ? कतिपयले हामीलाई भारतीय सेनासँगै लड भनेर पनि नउक्साएका होइनन् । तर हामी त्यसरी उक्साहटमा लाग्दैनौँ । हामी पहिला यहीँ लड्छौँ । यो राज्य दलाल पुँजीपतिवर्गबाट मुक्त गर्न चाहान्छौँ ।

एउटा कुरा प्रष्ट बताइदिनुस् । नेपालका हरेक आन्दोलन या परिवर्तनमा प्रत्यक्ष परोक्ष अन्तर्राष्ट्रिय शक्तिको हात हुने गरेको देखिन्छ । तपाईहरूको आन्दोलन तीभन्दा फरक हो ?
कम्युनिस्ट आन्दोलन भनेको अन्तर्राष्ट्रिय नै हुन्छ । त्यसकारण संसारका मजदुरहरू, सुकुम्बासीहरू, पीडितहरू सबै मिलेर क्रान्ति गर्छौं । हामी एक्लै हिँड्दैनौँ । हाम्रो नारा नै छ– ‘संसारका श्रमजीवी तथा उत्पीडित एक हौँ ।’ यसो भन्दैमा हामी फेरि कसैबाट निर्देशित छौँ भन्ने होइन ।


(२०७५ माघ ८, मंगलवार) ०८:१७ मा प्रकाशित

°
Weather from OpenWeatherMap

मुख्य समाचार

सबै

इलाका प्रहरी कार्यालय बिर्तामोडमा गैरकानूनी थुनामा रहेका नाबालककाे रहस्यमय मृत्यु

इलाका प्रहरी कार्यालय बिर्तामोडको हिरासतमा रहेका नाबालक मेचीनगर–६ का १५ वर्षीय किरण कार्कीडोली दर्जीकोको रहस्मृयमय मृत्यु भएको छ । प्रहरीले यसलाई आत्महत्या भनेको छ भने आफन्तले यातनाबाट बालकको मृत्यु.....

नेपालमा फेरि नयाँ संघर्ष जरुरी भइसकेको छ : बिप्लव, महासचिव, ने.क.पा.

प्रतिबन्धित नेपाल कम्युनिस्ट पार्टीका महासचिव नेत्रविक्रम चन्द विप्लवले जनताको वास्तविक मुक्ति ल्याउन र देशलाई बचाउन फेरि नयाँ संघर्ष जरुरी भइसकेको बताएका छन् । आफ्ना नेता,.....

पक्राउ परेका पत्रकार गिरी साधारण तारेखमा रिहा

समाचार लेखेकै आधारमा साइबर अपराध मुद्दामा अनुसन्धानका लागि पक्राउ परेका पोखराका पत्रकार अर्जुन गिरी बिहीबार साधारण तारेखमा रिहा भएका छन् । उनीलाइ साधारण तारेखमा रिहा गर्न काठमाडौं.....

Exchange Rate

Nepali Patro