के चुनाब हुन्छ भन्ने मोदीको प्रश्नमा निधिले के जवाफ दिए ?

संबाददाता : मोनिका गुरुङ     प्रकाशित मिति: (२०७३ चैत्र ५, शनिबार) ०१:३६

भारतीय प्रधानमन्त्री नरेन्द्र मोदीले ‘अबको १० महिनाका तीनै तह केन्द्र, प्रदेश र स्थानीय तहको निर्वाचन सम्पन्न होला त’ भनी जिज्ञासा राखेका छन् । भारतमा आतंकवादसम्बन्धी सम्मेलनमा भाग लिन आएका उपप्रधान तथा गृहमन्त्री विमलेन्द्र निधिसँगको भेटमा मोदीले त्यस्तो जिज्ञासा राखेका हुन् ।

निधिले आगामी वैशाख ३१ मा स्थानीय चुनाव र त्यसपछि क्रमश: प्रादेशिक तथा केन्द्रीय संसदको निर्वाचन तयारी भइरहेको बताएपछि मोदीले त्यस्तो जिज्ञासा राखेका हुन् । मोदीसँगको भेटपछि निधिले संविधान संशोधन तथा मधेसवादी दलहरूको मागबारे ‘स्पेसिफिक’ कुरा नभएको बताए । उनले स्थानीय चुनावका लागि आवश्यक पर्ने लजिस्टिक सहायताबारे मोदीलाई अनुरोध गरेको र सकारात्मक जवाफ पाएको बताए ।

आज प्रकाशित कान्तिपुर दैनिकका अनुसार, भारतीय विदेशमन्त्री सुष्मा स्वराज र गृहमन्त्री राजनाथ सिंहसँगको भेटमा भारतीय पक्षले निधिलाई मधेसवादी दलहरूका मागलाई सम्बोधन गरेर निर्वाचनमा जान आग्रह गरेको थियो ।

मोदी र निधिबीचको भेटपछि भारतीय विदेश मन्त्रालयद्वारा जारी विज्ञप्तिमा निधिले मोदीलाई नेपालको पछिल्लो विकसित घटनाक्रमबारे जानकारी गराएको उल्लेख छ । तर पछिल्लो घटनाक्रमबारे के उल्लेख भयो भन्ने खुलाइएको छैन । मोदीले निधिसँग सदीयौंदेखिको दुई देशको सम्बन्ध अझ सुदृढ गर्न आफू प्रतिबद्ध रहेको बताएको वक्तव्यमा उल्लेख छ । मोदीले नेपालले गर्ने आर्थिक र सामाजिक विकासका लागि भारतले सधैं सहयोग गर्ने बताएको भारतीय विदेश मन्त्रालयले जनाएको छ ।

निधिसँगको भेटमा भारतीय प्रधानमन्त्री मोदीले कञ्चनपुर घटनामा दु:ख व्यक्त गर्दै त्यसको निष्पक्ष छानबिन गर्ने र दोषी पाइएमा कारबाही गर्ने प्रतिबद्धता व्यक्त गरेका छन् । ‘हामी घटनाका बारेमा सत्यतथ्य छानबिन गर्छांै र दोषी पाइएमा कारबाही गर्दछौं, यसमा नेपालले चिन्ता गर्नु पर्दैन,’ मोदीको भनाइ उद्धृत गर्दै निधिले भने ।

निधिले भने नेपालको अनुसन्धानले भारतीय सीमा सुरक्षा बलको गोलीबाट नै नेपाली नागरिक गोविन्द गौतमको मृत्यु भएको देखिएको जानकारी गराएका थिए । नेपालले यस अगाडि नै भारतले मागेअनुसार पोस्टमार्टम रिपोर्ट उपलब्ध गराइसकेको छ । नेपालले भारतलाई पटक–पटक घटनाको सम्बन्धमा गल्ती स्वीकार गर्न आग्रह गरिसकेको छ ।

मोदीलाई जनकपुर, लुम्बिनी र मुक्तिनाथ भ्रमणको निम्तो
निधिले सरकारका तर्फबाट प्रधानमन्त्री मोदीलाई जनकपुर, लुम्बिनी र मुक्तिनाथको भ्रमण गर्नका लागि निम्तो दिएका छन् । निधिले मोदीलाई तीन ठाउँको भ्रमणका लागि अनौपचारिक कार्यक्रमसमेत बनाउन सकिने सुझाएका थिए । निमन्त्रणालाई मोदीले निकै खुसीका साथ लिएको निधिले बताए । यसअघि झन्डै ३ वर्ष अगाडि नेपाल भ्रमणको भ्रमणको समयमा मोदीले तीनै ठाउँको भ्रमणको तयारी गरे पनि अन्तिम समयमा आएर स्थगित भएको थियो । त्यही बेलादेखि नै नेपाल र भारतको बीचमा उच्चस्तरमा कायम भएको सम्बन्ध बिग्रने क्रम सुरु भएको विश्लेषकहरूको धारणा रहेको छ । भारतीय जनता पार्टीका नेताहरू अनौपचारिक कुराकानीमा त्यतिबेलाको भ्रमण स्थगनको विषयमा गुनासो व्यक्त गर्ने गर्छन् ।

निधिको भ्रमणलाई उच्च महत्त्व
उपप्रधानमन्त्री निधि विशेषगरी इन्डिया फाउन्डेसनले आयोजना गरेको आतंकवाद प्रतिवादसम्बन्धी सम्मेलनमा भाग लिन आएका हुन् । यो उनको औपचारिक भ्रमण होइन तर भारतले उच्च महत्त्व दिएको छ । निधिले भारतीय नेता, मन्त्रीहरूदेखि प्रधानमन्त्री मोदीसम्म भेटघाट गरेका छन् । भारत आउनुभन्दा अघि नै निधिलाई मोदीसम्म भेट गराउने आश्वासन दिइएको स्रोतको दाबी छ ।

निधिले सबै भेटघाटमा भएका राजनीतिक विषयवस्तुलाई निकै गोप्य राख्न चाहे पनि उनलाई दिएको महत्त्व तथा भेटघाटबाट राजनीतिक विषयमा कुराकानी भएको पुष्टि हुन्छ ।

विशेषत: सरकारले निर्वाचनको मिति घोषणा गरेको र मधेसवादी दलहरूले सरकारलाई समर्थन फिर्ता लिएको सन्दर्भमा भएको यो भेटलाई निकै महत्त्वका साथ हेरिएको छ । मोदीले निधिलाई भेट्ने/नभेट्ने अनिश्चितताको बीचमा निधि नेपाल फर्कने अन्तिम समयमा मोदीसँग भेट भएको थियो ।

मोदीलाई भेटेर सीधै निधि काठमाडौ फर्किएका छन् । यस अगाडि सरकार गठनलगत्तै विशेष दूतका रूपमा भारत आएका निधिले यस्तै खालको उच्च स्तरको भ्रमण गरेका थिए । स्रोतका अनुसार भारतीय विदेशमन्त्री
सुष्मा स्वराज आफैंले निधिको उच्चस्तरको भ्रमणका लागि अग्रसरता लिएकी थिइन् ।

मोदीलाई प्रधानमन्त्री र देउवाको बधाई
मोदीसँगको भेटमा निधिले हालै सम्पन्न पाँच प्रदेशको निर्वाचनमा भारतीय जनता पार्टीले प्राप्त गरेको सफलताप्रति प्रधानमन्त्री पुष्पकमल दाहाल र कांग्रेस सभापति शेरबहादुर देउवाको तर्फबाट बधाई दिएका छन् ।

 


(२०७३ चैत्र ५, शनिबार) ०१:३६ मा प्रकाशित

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना

Exchange Rate

Nepali Patro

कोरोना भाइरस नियन्त्रण सम्बन्धि गण्डकी प्रदेशको सूचना
कोरोना भाइरस नियन्त्रण सम्बन्धि गण्डकी प्रदेशको सूचना